Patuloy ang Diocese of Malolos Social Action Center (SAC) sa assessment ng pinsalang idinulot ng bagyong Karding sa lalawigan ng Bulacan.
Ayon kay Monsignor Melchor Ignacio, SAC director ng Diocese of Malolos, ang munisipalidad ng San Miguel, Bulacan, ang pangunahing napinsala matapos ang pagbahang idinulot ng bagyo.
“In general naman doon sa sampung bikarya, isang bikarya lang talaga ang medyo napuruhan, which is yung bayan ng San Miguel,” sabi ni Msgr. Ignacio.
Sa kasalukuyan, patuloy ang pagtugon ng SAC Malolos sa pangangailangan ng mga mamamayan na naapektuhan ng bagyo.
Bukod sa pagbubukas ng mga simbahan upang magsilbing evacuation centers ay tiniyak ni Msgr. Ignacio ang kahandaan na agad mamamahagi ng relief goods sa mga biktima ng bagyo.
“So ayun po ang number one priority ngayon, and then ayun nga yung assessment, tingnan namin kung ano pa yung pwedeng maibigay na tulong once na makita namin yung situation, tapos yung mga simbahan ay binuksan for evacuees simula kagabi,” pahayag ng pari.
