Maglalaan ng pondo ang Diocese ng Kalookan para mapatatag ang internet connectivity ng bawat parokya, ito ang sinabi ni Bishop Pablo Virgilio David sa kanyang pahayag sa Radio Veritas 846.
Ayon sa obispo, kailangan ang matatag na koneksyon upang maipagpatuloy ang mga programa ng Simbahan sa paghuhubog ng mananampalataya at ang ilan pang mga gawain ng bawat parokya.
Ang pondo na gagamitin para sa internet ay magmumula sa mga hindi natuloy na conferences at seminars dulot ng umiiral na quarantine protocols dahil sa pandemya.
“Maari naming i-redirect yung pera towards empowering every parish na magkaroon ng strong internet connectivity,” ayon kay Bishop David.
Aniya, bawat parokya, bawat bikaryato, bawat commission ng diocese ay pwede na mag-teleconferencing “para matuloy ang kanilang mga formation.
“Hindi tayo helpless, hindi tayo paralyzed,” ayon kay Bishop David.
Ang Diocese ng Kalookan ay binubuo ng 30 na parokya na nangangasiwa sa higit sa isang milyong mga Katoliko.
Mula sa ulat ng Radio Veritas 846
